Arrestimi i pelegrinëve serbë – Haradinaj përshëndet aksionin e policisë, ka edhe një kërkesë

Kryetari i AAK-së, Ramush Haradinaj, e ka përshëndetur aksionin e policisë së Kosovës sot në Gjakovë, ku u arrestuan katër pelegrinë serbë.

Përmes një postimi në Facebook, Haradinaj thotë se ata që ikën të turpëruar nga këtu në vitin 1999, nuk kanë vend në Kosovë, për asnjë arsye.

Ai shton se Policia e Kosovës dhe të gjitha uniformat e shtetit të Kosovës vazhdimisht tregojnë se Kosova nuk është vend pa të Zot, njofton Klankosova.tv.

“E përshëndesim aksionin e Policisë së Kosovës sot në Gjakovë. Ata që ikën të turpëruar nga këtu në vitin 1999, nuk kanë vend në Kosovë, për asnjë arsye. Policia e Kosovës dhe të gjitha uniformat e shtetit të Kosovës vazhdimisht tregojnë se Kosova nuk është vend pa të Zot. Nuk u lëkundën dhe nuk na zhgënjyen asnjëherë”, ka shkruar Haradinaj.

Në fund, kreu i AAK-së, thotë se rritja e pagave ndaj policëve, dyfishimi i tyre, nuk është vetëm kërkesë, por detyrim i shtetit.

Kujtojmë se pos katër pelegrinëve serbë të cilët u ndaluan në Gjakovë, edhe 12 të tjerë janë arrestuar në Prizren.

Lidhur me këtë aksion, detaje ka dhënë ministri në detyrë i Punëve të Brendshme, Xhelal Sveçla.